Јаан изӱ айдыҥ 21-23 кӱндеринде ӱлгерчилердиҥ «Кӱн Чарак» деп адалган кӱреелей куучынду ӧмӧлик-чатта туружып турган ӱлгерчи-поэттер сӱреен учурлу, ӧкпӧӧриштӱ, кӧдӱриҥи туштажузын Шабалин аймакта, «Тырлаҥда» деп амыраар базада ӧткӱрдилер.
«Најылыктыҥ оды» поэзиялык эҥир амыраар базада, поэт Качканак Багыровтыҥ јайаандык презентациязы Шабалин јурттыҥ тӧс библотеказында бийик кеминде ӧтти! Адакыда туштажуныҥ туружаачылары Камлак јуртка Ботаникалык садка айылдап барып јӱрдилер.
Литературалык туштажулар, поэзияныҥ эҥирлери сӱрекей ас болуп јат. Бӱгӱнги кӱнде бичинип, јеҥил эмес бу јолдо Сӧслӧ иштенип турган поэттер ас туштажып јадылар. Айдарда, Шабалинде ӧткӧн кӧдӱриҥилӱ эҥирде јайгы јараш кӱндерде јуулыжып, куучын-эрмек ӧткӱрип, ӱлгерлерин кычырып, јууктада танышканы кандый јакшы… Бу туштажуга кӧп ӱлгерилер барып болбогон до болзо, је санаа-кӱӱниле кожо болды деп айдарга јараар! Эмди де туштажулар болор, јараш ӱлгерлер јаҥыланар деп алаҥзыбайдыс!
Шабалинде ӧткӧн Поэзияныҥ эҥириниҥ туружаачылары, ӱлгерчи-поэттер — Улаганнаҥ Санина Наталья Николаевна ла Эльдепова Карлагаш Гавриловна, Кош- Агаш аймактаҥ Татьяна (Јӧӧжӧ) Сергеевна Чоюнова,Тожоҥтыдаҥ,Кӧкӧрӱдеҥ Бойдоева Альбина Тобоковна, Кан-Оозынаҥ Яграшева Наталья Александровна (Кырлыктаҥ), Мендешева Любовь Михайловна (Экинурдаҥ), Оҥдойдоҥ (Боочыдаҥ) Павел Саадакович Кедечинов, Шабалиннеҥ Лидия Романовна Чекурашева,Толунай Кастаковна Топчина, Шабалинниҥ » Одычак»( » Огонёк» ) литературалык клубтыҥ турчылары Вера Алексеевна Атавина, Любовь Александровна Анохина, Николай Васильевич Бугуев, Горно-Алтайсктаҥ Качканак Егорович Багыров, Солли Бронтоевна Ефимова, Алексей Александрович Ефимов, Мукур-Чаргыдаҥ Станислав Тадаевич Урчимаев.
Поэзияныҥ туштажузын Шабалин аймактыҥ ӱлгерчилерин, «Одычак» литературалык клубты, «Кӱн Чарак» деп адалган кӱрее-куучынду литературалык чатты башкарып турган ӱлгерчи-поэт, Россияныҥ Бичиичилер Бирлигиниҥ турчызы, канча бичиктердиҥ авторы Зоя Кастаковна Топчина (Толунай Топчина) тӧзӧп, башкарып ӧткӱргенин темдектеп, ого јаан алкыш-быйан айдар керек.
Алтай Сӧзис јаҥыланган јараш ла кеендик, тереҥ ле байлык туштажу Шабалин аймактыҥ байлу телкемдеринде ӧдӱп, оныҥ туружаачыларына сӱрекей бийик кӱӱн-тап сыйлады!
