Тулаан айдыҥ 21-чи кӱнинде поэзияныҥ Телекейлик кӱни темдектелет. Бу кӱнде ӱлгерчилер јуулыжып, јаҥжыгуларын, улу поэттерди эске алынып, ӱлгерлерин кычырат. Мындый јилбилӱ туштажу кечеги кӱнде Улаган аймакта ӧтти. Озо ло баштап албатызы сӱрекей иштеҥкей, јайалталу, кӱндӱзек, ӧзӧги бай деп адаткан бу талада калганчы јылдарда Сӧскӧ кӱӱндӱ кӧп ӱлгерчилер ӧзӱп чыккан деп темдектеерге јараар. Бу ла јуугында олор ӧмӧлик јуунты-бичик кепке базып, албатызына јаан сый эттилер.
«Телеҥит кӱрмел одузы» деп адалган бичиктиҥ таныштырузы сыраҥай ла Поэзияныҥ кӱнинде ӧдӱп, куучын-эрмекте бичиичилер, ӱлгерчилер Сурайа Сартакова, Карлагаш Елдепова, Марина Ябыкова, Наталья Санина, Алтынай Санаа, Сурна Белешева, Эмилия Чальчикова, Наталья Тымыева, Светлана Карулова, Аржан Чекурбашев туруштылар.
Алтынай Санаа (Алена) эҥирди ӧткӱрип, башкарды. Јуулган айылчылар кӱӱн-санаазыла ӱлежип, ӱлгерлерин кычырдылар. Анчада ла јаан јашту бичиичи Сурайа Сартаковага ајару ла тоомјы јаан болды.
Сӧстиҥ ле Ӱлгердиҥ кӱнин башкарып, Улаган-Ичиниҥ кӧкси байлык, каламы курч, Музаныҥ ийдезин сескен јайалталу улузын јууп, мындый учурлу куучын-эрмекти аймактыҥ культура бӧлӱгин башкарган Солунай Санаага јаан быйанду артар керек. Оныҥ башкарганыла туштажу бийик кеминде ӧткӧн.
Öткӱрмеге турушкан ӱлгерчилерге «Улаганныҥ солундары» газетте бичимелдери јарлалып, јöмöлтöлӱ болгонын баалап керелеген Быйанду самараларын редактордыҥ ордынчызы Чейнеш Манзырова,,аймактыҥ собес—эл- јондык бирлигиниҥ јааны Эмурад Санаа туружып, уткуулду сöстöрин айдып, табыштырдылар.
Улаганда Культура ла спорт бӧлӱгиниҥ јааны Солунай Санаа Быйанду самаралар,сыйлар табыштырып, уткуды.
Öмöлик бичикте јарлалган авторлордыҥ эҥ јаан јашту öрöкöн Токоеков Трифон Ивановичтиҥ баркызы, 3 кл.ӱренчиги Токоекова Нианила таадазыныҥ ӱлгерлерин кычырып,туштажуга келгендерди јилбиркедип, сӱӱндирген.
Поэзияныҥ јаскы туштажузы Улаганда мынайда бийик кеминде темдектелгени алтай литератураныҥ бӱгӱнги ӧзӱмине јаан учурлу.
