Арутай Маймановко, Алексей Маймановко, Николай Хабаровко
Jеҥ jастанган бастыра алтай jуучылдарга
***
Jана баспас кылыкту
Герой-jуучылдарга jажына мак!
Jардын тÿжÿрбес, jажын билбес
Алтай баатырларга улу мак!
Ороон туруп чыгарда
Туруп чыккан алтай уулдар!
Орой кÿски jалаҥда
Jеҥ jастанган jуучылдар!
Алтай адын калыктар ортодо
Бийик апарган баатырлар!
Алтай мааныны маанылар ортодо
Тÿжÿрбей туткан алыптар!
Герой уулдар чыдаткан
Эне-адага jажына мак!
Агару учурын jетире апарган
Герой-jуучылга ундылбас мак!
***
Алтай уулдарга
(реквием-сыгыт)
Кайран уулдар, алтай уулдар,
Бу jÿрÿмди чебер jÿрзеер кайдар…
Сÿÿп jÿрген алтай кыстарга
Jÿрÿмерди чеберлеп берзеер кайдар…
Кату jолдорлу jараш уулдар…
Кату салымду кайран уулдар…
Орой тÿндерде ыйлайт балдарар…
Ырызын таппайт тул эш-бараанар…
Бузылып калган jÿрÿмдик jолыгар,
Бурылыш билбес jолдорго бардыгар,
Адын адатпас талага атандар,
Кайран кööркийерди кемге артыстар…?
От-чечегин тудунган келиндер
Jанаарга барып, тымый тÿшкилейт.
Бÿтпеген сÿÿштиҥ, jÿрÿмниҥ белеги
Качан да келбес… Ачузын сескилейт.
Кайран уулдар, кару уулдар,
Сÿÿнип jÿрген кÿндерер кайда…
Кайран Алтай jереерде jастыҥ
Jыдынаҥ кöкÿген jылдар кайда…
Мÿркÿт ошкош алтай уулдар,
Аргымак минген бöкö уулдар,
Бу jÿрÿмди чебер jÿрзеер кайдар…
Кару кыстарды сÿÿп jÿрзеер кайдар…
***
