Кочкор айдыҥ 22-чи кÿнинде Мöндÿр-Соккон jуртта солун ойын-маргаан öтти. Эртен турада айас кÿнде, соокты соок то деп керектебей, улус jурт администрацияныҥ jанына беш округла-бöлÿкке командага бöлÿнип, jаанду-jашту, кöрööчилерлÿ, «оорычыларлу» jергелей туруп, парадка чыккандар.
Кажы ла команда бойы таҥынаҥ атту-чуулу, аҥыланар кийим-кептÿ, маанылу ла кедери курсактанар айак-калбакту. Шалтыр кырдыҥ эдегинде шуурганда шуурылып калган кÿртке бир уунда тÿрген-тÿкей jедип, Тöрöлиниҥ коруучылыныҥ кÿнине учурлалган «Мööрöйлöжип кöрöли» деп байрамдык маргаандарды баштагандар.
Jурт jеезениҥ башкараачызы Е.С. Каштаева элдеҥ озо сöс айдып, ончо jуулгандарды байрамла уткып, эмдиги öйдö черÿчил ле jуучыл молjузын бÿдÿрип турган jерлештеристи адап ла темдектеп, аҥылу jуучыл операцияда туружып, тургуза öйдö jуртта jанып келген ле амыралтада jÿрген эрлерге ле черÿде бийик jедимдерге jеткен гвардеец алыптарга кур курчап, оморкодулу сöстöрин айтты. Онойдо ок бойыныҥ сöзин Алтай Республиканыҥ Эл-Курултайыныҥ ла Кан-Оозы аймактыҥ депутаттар Совединиҥ депутаттары А.А. Ябыева ла А.В. Бырышкаков айдып, сыйлар сыйлады.
Кöдÿриҥилÿ керектердиҥ кийнинде Шалтыр кырдыҥ эдегинде сÿÿнчилу маргаан-ойындар öтти. Тереҥ кÿртти ыра jолдогончо jылган, бийик ажатан буудактарды тоҥкош ажып öткöн, таарларга кирип калыган, ойто кырды öрö кем канайып — бут бажына jÿгÿргени, тöрттамандап эҥмектеп те чыккандары бар, jе ончо кÿÿн-санаа артыктарына, алсогорына, jеҥерине jÿткÿген кеминде болды. Карга кöмÿлгенче каткырыжып, бой-бойлорысты кöкÿдижип, санаа-кÿÿнисти кöдÿрип алдыс.
Бу байрамда кöп эр улус турушты: jиитери де бар, орто до jаштулар. Јаан јаштулардаҥ бу туштажу-байрамда Котлаева Белечен Иркитовна, Чичканова Светлана Сюнеровна, Кучукова Раиса Фёдоровна, Сексекова Татьяна Арпаковна, Клара Николаевна Сапышева ла о.ö. турушкан. Анайып, бис ончобыс jаан кардыҥ ӱстинде тоолонып, ойноорго јымжак, чыккан-чыдаган jериске аҥданып-арутанып алдыс.
Келиндер изÿ каша ла чай азып, айылдардаҥ экелген аш-курсакла тамзыктаган. Ончо улус айылдарына сÿреен бийик кÿÿн-санаалу jанган. Јурттыс мынайып ла нак болуп кӧндӱксин, jаранып ӧссин! Байрамды баштап öткÿрерге болушкан башкараачыбыс Е.С. Каштаевага, культишчилер И.М. Ишминага ла А.Н. Папашевага, спорт методист Токтомысов Т.И. ле самболо балдар тазыктырып турган Оспанов Э.А. јаан быйаныс айдып турубыс. Јаанды-јашты јыргаткан, ончобысты сӱӱндирген јакшы байрам öткöни санаада узакка артар.
Мындый байрамдар бисте алдында да öткÿрилип туратан, jе коронавирус, карантин, карыкчалду öйлöр деп токтоп калган болгон. Аҥылу jуучыл операцияда уулдарыс туружуп, jеҥ jастанып jыгылгандар, бир уул суру jок, шыркаладып jангандары бар. Бу бастыра ла öзöк öйкöгöн сыс.
Черÿчил молjулу jерлештерисле, черÿде туруп Тöрöлин коруулында тургандарла бис оморкойдыс. Олорго jöмöлтö-болуш болзын деп маскировка сеткалар, окопто jылынар ÿспекчиндер, алтай курлар эдип, акча-манатла, барыбысла jаантайын ÿлежедис. Онойдо ок школдыҥ öмöлиги талканды алтай сарjула булгап, бир кижиге деп башка-башка jелим айактарга бöлÿп белетеген. Ол ток курсак окопто jуучылдарга айылын эбелткени jарт ине. Бу иште анчада ла оны тöзööндÿ баштаарында Э.Б. Токтомысов эрчимдÿ иштенип jат. Jурттыҥ ватсапптагы чадында Эрмен Борисович jарлап, «келигер» ле дезе, энелер, эjелер jуулыжып келет.
Бастырабыстыҥ кÿÿнзегенис: уулдарыс Алтайына эзен-амыр jанып келзин, айылду-jуртту болзын, мал-аш, бала-барка азыразын!
