Анастасия Мухортова – педагогический колледжтиҥ студенти. Кан-Оозы аймактыҥ Кырлык јуртында чыккан-ӧскӧн.Ӱлгерлер чӱмдеер ченелтени 13-14 јаштуда баштаган.
«Школдоҥ јанып келееделе, бажыма улайын ла чӱмдемел сӧстӧр кирип туратан. Онойып турганча, бӱткӱл ӱлгерди јетире бичип албай, таштап салатам. Калага ӱредӱге келеле, ойто бичинип баштагам. Чӱмдӱ сӧстӧр кӧп ле сабазында тӱндер сайын келет» – деп, ол темдектейт. Бӱгӱн јиит ӱлгерчиниҥ јайаандык ижиле танышытырып турубыс.
***
МЕНИҤ КАРУ ЭНЕМ
Кӱнниҥ чогы тӱҥей слерге,
Јылу берет јӱрегимге.
Эҥ ле кару, эҥ ле ару,
Энейим мениҥ.
Јымжак колдороор бажымды сыймайт,
Јылу сӧстӧрӧӧр мени эркелейт.
Кайкамчык кара кӧстӧрӧрдӧ,
Карыкчыл јок, јӱк сӱӱнчи јӱрет.
Сакып мени јаантайын,
Јажыдып айткан эрмегер.
Ырыс сыйлайт слер бар болгоноор,
Ыйык јолысты ачып турганаар.
Узак јаш јажагар, кару Энем,
Слердиҥ јылугар јӱректе артат,
Јердиҥ ӱстинде эҥ ле баалу,
Слердиҥ јаркынду јарыгар!
***
АЛТАЙДЫҤ БААТЫР УУЛДАРЫ
Ӱч-Сӱмердий бек ле кату слер,
Алтайдыҥ адын бийик тудуп барадыгар.
Јалтанбас јӱрек, кӱчтӱ ийде слерде,
Тӧрӧл јеристи коруп турадыгар.
Мӱргӱӱлис бистиҥ — слерге јаан кору,
Јеҥӱлӱ јаныгар, ак болзын јолыгар!
Шуулаган салкындый — кату кӱӱнигер,
Баатырлар јолын слер улалтадыгар.
Ок тийбезин, соок јер кармай албазын,
Алтайдыҥ ээзи слерди корузын!
Сакыйдыс бис слерди, баатыр уулдарыс,
Јылу кучагысла слерди уткыырыс!
Ару теҥерини биске сыйлагар,
Алтайыс ийдезиле слерди курчазын.
Јердиҥ ӱстинде эҥ ле кӱндӱлӱ —
Слердиҥ ачык, кӱчтӱ јарыгар!
Јайаан-Алтай слерди коруп алзын,
Јеҥӱлӱ јаныгар — ырыс биске келзин!
***
АЛТАЙЫМ
Алтайым мениҥ — алтын кабайым,
Айландыра турган — бийик тууларым.
Агын сууларым кӱмӱштий jаркындалып,
Агаш-тажы, чечектери jайылат.
Алтай тилим — мениҥ байлыгым,
Ай-Кӱнниҥ јылузы, ару кейи,
Ада-ӧбӧкӧлӧрдӧҥ арткан энчизи,
Кудай берген jеримди мактап ла jадым!
***
