Культуралык баштаҥкайды орныктырары аайынча «Чӱм-јаҥдар ла бӱгӱнги ӧйлӧр» деп адалган коммерциялык эмес автоном биригӱ грант ойноп алып, алтай бӧрӱктер кӧктӧӧрине ӱредӱ ӧткӱрди.
Аймактардаҥ 11 ус ӧдӱп јаткан јылдыҥ чаган айыныҥ 31-чи кӱнинеҥ ала кочкор айдыҥ тӧртинчи кӱнине јетире јуулыжып, Горно-Алтайсктагы Г.И. Чорос-Гуркинниҥ адыла адалган культуралык колледжте тӱлкӱниҥ бычкактарынаҥ алтай бӧрӱктер кӧктӧӧриниҥ јажыттарыла, ченемелиле ӱлешти. Ӱредӱде олор терени уужап, ол теренеҥ ӧӧндӧр кезип, бӧрӱкти кӧктӧгӧндӧр. Анайда ок усчылар алтай бӧрӱктердиҥ тыш бӱдӱмин кееркедип јарандырары аайынча билгирлер база алдылар.
Беш кӱнниҥ туркунына кӧктӧлгӧн бӧрӱктер јаан байрамдарда артисттер тузаланар эдип, Албатыныҥ јайаандыгыныҥ республикан тӧс јерине берилген. Ӧткӱрилген ӱредӱ видео ажыра ӧрӧги адалган тӧс јердиҥ сайтында ла youtub-каналда јарлалар.
«Алтай албатыныҥ јаҥжыккан культуразында алтай бӧрӱктиҥ учуры јаан» деп адалган ӱлекер АР-дыҥ иш, јонјӱрӱмдик ӧзӱм ла эл-јонды ишле јеткилдеери аайынча министерствозы ажыра Президенттиҥ фондынаҥ грант алган. Ӱлекердиҥ тӧс ууламјызы — алтай албатыныҥ јаҥжыккан культуразында тӱлкӱниҥ бычкактарынаҥ бӧрӱк кӧктӧӧрин орныктырары. Оныҥ ижинде кӧп тоолу керек-јарактар ӧткӱрилери темдектелет. Ол тоодо, тулаан айда алтай бӧрӱктерге учурлалган «тегерик стол» ӧткӱрери темдектелет. Мында јаҥыс ла бычкак бӧрӱктер эмес, је анайда ок ӧскӧ дӧ терелердеҥ, килиҥ бӧстӧрдӧҥ бӧрӱктер кӧктӧӧрине кӱӱнзегендерди ӱредери аайынча сурактар кӧрӱлер.
«Чӱм-јаҥдар ла бӱгӱнги ӧйлӧр» деп адалган коммерциялык эмес автоном биригӱ ӱлекердиҥ туружаачыларына алкыш-быйан јетирип, мынаҥ да ары ӧмӧ-јӧмӧ иш улалар деп иженет.