Јаан изӱ айдыҥ 26-чы кӱнинде Кан-Оозы аймактыҥ эҥ ле јаан јурттарыныҥ бирӱзи болгон Кырлык јурт бойыныҥ тӱӱкилик 400 јылдыгын темдектеген.
Бу кӱн сӱрекей айас јакшы кӱн турган. Ады јарлу «Аргымак» стадиондо јурттыҥ албатызы, айылчылар — Кырлыкта ӧзӱп-чыдаган, бу ла тӧрӧл јериниҥ школын божоткон, эмди тӧрӧлистиҥ башка-башка толыктарында јуртап, иштеп-тоштоп јӱрген — улус јуулганы сӱрекей солун ла јӱрекке кару болды. Олордыҥ ортозында тергеебисте јарлу ӱредӱчилер, эмчилер, аргачылар, спортчылар, кожоҥчылар, бичиичилер, журналисттер, МВД-ныҥ ла прокуратураныҥ ишчилери болгонын темдектеер керек.
Чындап та, Кырлык јурт јайалталу улузыла јаантайын аҥыланган. Оныҥ учун узак кӧрӱшпеген јерлештер бойы-бойына сӱӱнип, куучын-эрмек ӧткӱрип, эзен-амырын сурашканы кӧрӱмјилӱ болды. Јаан јашту ветерандар ла јиит ӱйе мындый учурлу байрамда бирлик болуп, тӧрӧл талазын сӱӱгенин, тоогонын чыгара айтканы текши кӱӱн-санааны кӧдӱрӱп, јарандырып, эҥ ле артык кӱӱн-тап сыйлаганы чын! Јурттыҥ јеезезиниҥ, культура бӧлӱгиниҥ, спортчыларыныҥ, СПК-ныҥ ишчилериниҥ, ӱредӱчилерниниҥ текши байрамды тӧзӧп ӧткӱргенин аҥылаар керек.
Выставка-кӧрӱнеҥ јурттыҥ ӧдӱп келген тӱӱкилик јолы элестелип, мында јуртаган, иштеген бастыра албатыны эске алдырган. Јараш маргаандар, алтай кожоҥ канай кайкатпайтан эди. Кӱреш, тебек тебиш, тоҥжаан јӱгӱрӱш, ок-јаа, ат јарыш! Албатыбыстыҥ ӧзӧги ле оморкодузы болгон бу ӧс спортбӱдӱмдерле маргаандар јуулган улусты сӱӱндирген. Тергеебисте ле телекейде ады-чуузы чыккан кожоҥчылардыҥ алтай јаҥары, кайы тӧрӧл јуртыстыҥ кобы-јигине јаҥыланган деп айдарга јараар.
Литературалык кӧрӱ болгоны база солун. Оныҥ туружаачылары тӧрӧл јеристиҥ тӱӱкизин озогызынаҥ бейин ойгортып, иштеген-тоштогон бастыра јаан улустыҥ — койчылардыҥ-малчылардыҥ, трактористтердиҥ-тискинчилердиҥ, ӱредӱчилердиҥ, јууныҥ ветерандарыныҥ — ады-јолын адаганы учурлу!
Јуулган улуска текши ажаныш тӧзӧлгӧн. Ады-чуузы чыккан малчылардыҥ, койчылардыҥ тӧрӧли болгон адында мал-кой канай сойылбайтан эди, кӧчӧ канай азылбайтан эди… Алтай аш-курсак јайрап, кажы ла кижи акту кӱӱннеҥ кӱндӱлелген!
Бу јаан байрамда кем де бойын аҥылабай, текши албаты болуп, бирлик туруп чыгып, кабай болгон тӧрӧлиниҥ јылдыгын темдектеп салганы јараган. Кайда да јӱрзеес, је чыккан-ӧскӧн јерис јӱрегисти кабайлаткан кай болуп, сыс болуп, сӱӱнчигис ле ӧзӧгис болуп артып калар!
(Литературалык кӧрӱниҥ туружааачыларыныҥ бастыра иштери «Каан-Алтай» јетирӱлик порталда јарлалар!)
