1993 јыл: депутатка Михаил Гнездилов ӧткӧн — 24,25%; Фаина Якшимаева — 20,28%, Сергей Пекпеев — 18,67%. Ф.Якшимаева ла С.Пекпеев јӧптӧшкӧн болзо, олордыҥ кажызында ла Госдуманыҥ депутады болор арга болгон.
1995 јыл: депутатка Семен Зубакин ӧткӧн — 22,21%, Владимир Кыдыев — 17,69%, Николай Чеконов — 11,86%, Фаина Якшимаева — 5,24%, Валерий Сат — 1,26%. В.Кыдыев ле Ф.Якшимаева јӧптӧшкӧн болзо, јарлу журналистте Госдуманыҥ депутады болор арга болгон. Је В.Кыдыевке удура М.Гнездиловты јӧмӧгӧн республиканыҥ јаҥдары иштеген. Олор баштап В.Кыдыевти артык подписной листтерин М.Гнездиловко берзин деп сӱмелегендер, экинчизинде, В.Кыдыев ле Ф.Якшимаева ортозында куучын-эрмек болбозын кичеегендер, ӱчинчизинде, 1995 јылда Ф.Якшимаеваны Алтай Республиканыҥ Арбитраж Јаргызыныҥ јаргычызына туткандар.
1998 јыл: депутатка Михаил Лапшин ӧткӧн — 44,66%. Бу талдаш алтай кандидат учына јетире турушпаган сок јаҥыс талдаш болгон. Талдаш алдында алтайлардыҥ тоозы 4 болгон: Юрий Антарадонов, Геннадий Сумин, Григорий Пильтин ле Владимир Кыдыев. Талдаш башталарда, ӱч нӧкӧр кандидатураларын В.Кыдыевке уштыырыс деп сӧстӧрин бергилеген болгон, је талдаштардыҥ учында Ю.Антарадонов, Г.Сумин ле Г.Пильтин јаҥыс ла бойлорыныҥ кандидатураларын уштыган эмес, је В.Кыдыевти де талдаштаҥ јайлаткандар.
2002 јыл: депутатка Сергей Пекпеев ӧткӧн — 48,6%. Сергей Огнев — 19,3%, Владимир Гришин — 11,3%, Леонид Щучинов — 8,9%, Анатолий Шегай — 1,6%, Сергей Кочетков — 1,3%. Бу алтай кандидат јаҥыскан турушкан баштапкы талдаш болгон.
2003 јыл: депутатка Сергей Пекпеев ӧткӧн — 40,11%. Николай Чеконов — 6,51%, Алексей Кучигашев — 0,61% алгандар.
2007 јыл: талдаш јӱк ле партийный списокло ӧткӱрилген, Россия Федерациязында «Единая Россия» (64,3 процент ӱн, 315 депутатский мандат), КПРФ (11,57 процент, 57 мандат), Алтай Республикада «Единая Россия» — 69,46%, КПРФ — 7,99%. Алтай Республикадаҥ депутатка единоросс Сергей Пекпеев тудулган.
2011 јыл: талдаш база партийный списокло ӧткӱрилген, Алтай Республикада «Единая Россия» — 53,33%. КПРФ — 21,55%, Бу талдашта Алтай Республикадаҥ депутатка кем де тудулбаган. Бу талдашта кӧп алтайлар В.Ромашкин ле КПРФ учун иштегилеерде, единоросс Сергей Пекпеевке 2 муҥ кире ӱндер јетпей калган, коммунист Ромашкин база ӧтпӧгӧн.
2016 јыл: талдаштар бир мандатту округ ла партийный списокло ӧткӱрилген. Талдаштардыҥ алдында «Единая Россия» праймеризин ӧткӱрерде, чаазында бичилген турултада баштапкы јерлерде Иван Белеков — 48,24% ле Родион Букачаков — 43,57% болгондор. Бир мандатту округла депутатка Родион Букачаков ӧткӧн — 44,79%, «Патриоты России» ле «Зеленые» партиялардыҥ бир мандатту округла кандидаттары Геннадий Сумин ле Александр Чеконов бойлорыныҥ кандидатураларын Р.Букачаков учун уштыгандар. Тимур Казитов — 8,54%, Урмат Князев — 4,93% алгандар. Партиялар ортодо «Единая Россия» — 48,81%, Иван Белеков «Единая Россияныҥ» Томский, Кемеровский областьтар Алтай край ла Алтай Республика кирген партийный списогыла депутатка Кузбасстыҥ губернаторы Аман Тулеевтиҥ ордына ӧткӧн.
2021 јыл: талдаштардыҥ алдында «Единая Россия» праймеризин ӧткӱрерде, Москва јӧптӧп койгон Родион Букачаков ӧтпӧй, чаазында бичилген турултада партийный списокло Иван Белеков (3725 ӱн), бир мандатту округла Роман Птицын (2509 ӱн) болгондор. Талдаштардыҥ бойында текши тооло 14 партия ла Алтай Республика кирген бир мандату округла текши тооло 9 кандидат туружар, ол тоодо алтайлардаҥ Мария Ардиматова («Новые люди»), Василий Кудирмеков («Партия свободы и справедливости»), Николай Толкочоков (Российская партия пенсионеров за социальную справедливость), Елена Туденева («Коммунисты России»), Алексей Тюхтенев («Справедливая Россия – За правду»).