Школго баргалак балдардыҥ кичӱ јажы – текши таскадуда баалу ӧй. Бу ӧйдӧ бала айландыра телекейге, јаан јӱрӱмге удура баштапкы ла алтамдар эдет.
Шак бу ла ӧйдӧ бала айландыра јӱрген ӧскӧ улуска, эбиреде болуп турган керектерге, ишке канайда баштанары јанынаҥ баштапкы ла ченемел алат. Бу ӧйдӧ оныҥ кылык-јаҥы быжуланып, бойын канайда чын тудатаны тӧзӧлип јат. Бу ла јаш ӧйинде огош болчомдор кандый укту болгонын, албатыда кандый чӱм-јаҥдар бар болгоны, культуразы кандый деген сурактарды јаҥы ла оҥдоп-билип, бу оҥдомолдорло јууктада таныжат. Баштапкы таныжунаҥ ала баланыҥ эстетикалык таскадузы башталат.
Горно-Алтайск каланыҥ «Василек» деп адалган садында «Айучак» деп алтай атту кружок канчанчы јылга улай једимдӱ иштеп келди. «Айучакта» балдар алтай тилди ӱренип, тӧрӧл јеристиҥ тӱӱкизиле, алтай албатыныҥ чӱм-јаҥдарыла јууктада таныжат. Балдарга јилбилӱ болзын деп, бу адалган ууламјыларды олор јеҥил оҥдозын деп, бис кӧп тоолу ойындар, кӧрӱлер, байрамдар ӧткӱредис. Ойындарла коштой албатылык байрамдарды ӧткӱрӱп турганыс балдарды алтай культурала јууктада таныштырарга болужын јетирет. Бу байрамдардыҥ ортозында аҥылу јерде алтай јаҥы јыл – Чагаа байрам. Чагаа байрам «Россияныҥ албатылык байрам-кереги» деп статус-атты ороон ичинде ойноп алып, канчанчы јылга улай мындый атла адатты. Республикабыстыҥ кажы ла толугында ӧткӱрилип турган байрам јылдаҥ јылга ӧҥжип-ӧзӱп бараатканын темдектеер керек. Ак-Чагаа, Ак-байрам деп улус башка-башка адап турганы ару кӱӱн-санаала, ару јӱрӱмле тӱҥейлелигениле тудуш. Бистиҥ садта, «Айучак» кружокто байрам база јилбилӱ, сӱӱнчилӱ, нак ӧткӱрилет. Балдар алтай кеп-кийимдерин кийген, алтай ойындарды ойноп, кожоҥдорды кожоҥдойдылар. Эне-адалардыҥ, таскадаачылардыҥ кӱчиле алтай аш-курсактыҥ кӧрӱзи ӧткӱрилет. Балдар курут, талкан, чеген, боорсоктор деп јажына азыранган аш-курсагысты амзап, бу курсактыҥ тӱӱкизиле таныжып, алтай албатыныҥ чӱм-јаҥдарын јууктада билер болуп, чыдайдылар. Мындый байрамдардыҥ кийнинеҥ балдар бойы-бойына, таскадаачыларына, эне-адаларына јуук болуп, алтай ӧзӧги байып, тилин билер болуп ӧскӱлейт. «Айучак» садтыҥ таскадаачылары бу ишти чебер апарып јадылар.